20, ఫిబ్రవరి 2023, సోమవారం

విజయవాడలో లెనిన్ సెంటర్

విజయవాడలో ప్రధాన కూడళ్ళల్లో "లెనిన్ సెంటర్" ఒకటి . ఈ కూడలి గవర్నర్‌పేటలో అలంకార్ వంతెనకు అతి సమీపంలో, రైవస్ కాలవ పక్కనే ఉన్నది. ఆ ఏరియాకు "లెనిన్ సెంటర్" అనే పేరు రావటానికి కారణం అక్కడ ఉన్న ఈ విగ్రహమే.

అక్కడ లెనిన్ విగ్రహాన్ని 22 ఆగష్టు 1987న అప్పటి సోవియట్ యూనియన్ ఉపాద్యక్షురాలు వి ఎస్ షివ్‌చెంకో ఆవిష్కరించారు. అప్పట్లో , ఈ విగ్రహం రష్యా నుంచి వచ్చిందని అనుకునేవారు. ఈ విగ్రహాన్ని చెక్కిన శిల్పి ఆర్డర్ ఆఫ్ లెనిన్ అవార్డ్ గ్రహీత శ్రీ ఓరఖోవ్అ ని తెలుస్తున్నది. ఈ విగ్రహం ఇప్పటికీ చెక్కు చెదరకుండా ఉన్నది. బాగా మైంటైన్ చేసి పదిలపరుస్తున్నారు.
ఆ ప్రాంతలో (రైవస్ కాలువ ఒడ్డుకు ఆనుకుని)సెకండ్ హాండ్ పుస్తకాల దుకాణాలు బాగా ఉన్నాయి. విజయవాడలో పుస్తక ప్రేమికులకు ఈ దుకాణాలు ఒక వరం. ఎక్కడా దొరకని, ప్రస్తుతం ప్రింటులో లేని (Out of Print) అపురూప పుస్తకాలు ఈ షాపుల్లో దొరికే అవకాశం ఉండటంతో పుస్తక ప్రియులు విజయవాడనుంచే కాకుకండా చుట్టుపక్క ఊళ్ళనుంచి కూడా, ముఖ్యంగా ఆదివారం రోజున వచ్చి తమకు కావాల్సిన పుస్తకాలు వెతుక్కోవటం కనిపిస్తూ ఉంటుంది. పుస్తక ప్రియులకు బాగా పరిచయం అయిన 'ప్రాచీన గ్రంధమాల' ఇక్కడే ఉన్నది.
ఇది మా చిన్న తనాల్లో(1960-70) ఒక చిన్న సందు. అక్కడ ఒక నర్సరీ ఉన్నట్టు గుర్తు. అటునుంచి అంటే ఏలూరు రోడ్డు నుంచి ఇటు గాంధీనగరానికి సిటీ బస్సులు ఈ సందుగుండానే వెళ్ళేవి. అప్పట్లో ఇది వన్ వే ట్రాఫిక్ గా ఉండేది. ఇప్పుడు అక్కడ రెండు రోడ్లు ఉన్నాయి ఒకటి రైవస్ కాలవ ఒడ్డునే ఉన్న రోడ్డు మరొకటి పాత రోడ్డు. ఈ రెండిటికి మధ్య ఈ విగ్రహం ఉన్నది.
1991లో సోవియట్ యూనియన్ పతనం అనంతరం రష్యా, ఉక్రైన్(రష్యానుంచి విడివడి ప్రత్యేక దేశం అయ్యింది) వగైరా దేశాల్లో లెనిన్ విగ్రహాలు తొలగించబడినాయి అని ఒక వార్త ప్రచారంలో ఉండేది. లెనిన్ విగ్రహాల సంఖ్య తగ్గిన మాట వాస్తవమే కానీ, ఇంటర్‌నెట్లో వైతికితే దొరికిన సమాచారం ప్రకారం, 2019 నాటికి రష్యాలో 6000 (1991లో 7000), ఉక్రైన్‌లో 350 (1991లో 5500) ఉన్నాయని తెలుస్తున్నది. సోవియట్ యూనియన్, తూర్పు యూరోపు దేశాలు (ఒకప్పటి కమ్యూనిష్ట్ ప్రభావిత దేశాలు) కాకుండా మిగిలిన ప్రపంచంలో 1991 లో 150 లెనిన్ విగ్రహాలు ఉంటే, 2019 నాటికి 25 మాత్రమే ఉన్నాయట. అలా ఇప్పటికీ నిలిచి ఉన్న, ఆ మిగిలిన పాతిక విగ్రహాలలో విజయవాడలో ఉన్న లెనిన్ విగ్రహాం ఒకటి. విగ్రహాల సంఖ్య గురించిన సమాచారం ఇంటర్నెట్లో దొరికిన వెబ్‌సైటు లింకు: https://www.soviettours.com/.../how-many-lenin-statues-left




రేడియో అభిమాని(నా)తో ఇంటర్వ్యూ


నాకు రేడియో కార్యక్రమాలు అంటే చాలా ఇష్టం. నాకు ఇష్టమైన ఆకాశవాణి కార్యక్రమాలు రికార్డ్ చేసుకోవటం నా కాలేజి రోజులనుంచి హాబీ. ఈ విషయం తెలుసుకున్న వ్యూస్ యుట్యూబ్ చానల్ వారు (ఉషశ్రీ గారి కుమార్తె, అల్లుడు నిర్వహిస్తున్నారు), కొన్ని రోజుల క్రితం వారి స్టుడియోలో ఇంటర్వ్యూ చేశారు. ఆ కార్యక్రమం నిన్న (4 ఫిబ్రవరి, 2023) యుట్యూబులోకి అప్లోడ్ చేశారు. Subrahmanyam Kvs గారికి Jayanthi Puranapanda గారికి నా ధన్యవాదాలు.
(Click this link)



17, మార్చి 2022, గురువారం

 డిజె టిల్లు సినిమా చూశాను

మొదట ఒక చోట హాస్య ప్రధానమైన సమీక్ష చదివి, ఈ సినిమా చూడటం మన పాతివ్రత్యాన్ని చెడగొడుతుందేమో అని భ్రమ పడి చూడలేదు. కానీ స్నేహితుడు/కొలీగ్ Veluri Ramakrishna Rao చెప్పటంతో "ఆహా" చానెల్ లో, ఉన్న ఈ సినిమాను, నిన్న(16 March,2022) సాయంత్రం వద్దువద్దు అనుకుంటూనే క్లిక్ చేసి చూడటం మొదలుపెట్టాను. సినిమా మొత్తాన్ని. రెండు మూడు విడతలుగా, చివరి విడత జష్ట్ పొద్దున్నే(17 03 2022) చూడటం ముగించాను. ముందు, సినిమా పేరు అర్ధం కావాలిగా! ఈ "టిల్లు" ఏమిటసలు అని ఆలోచిస్తే, ఆ కుర్రాడి తండ్రి ముచ్చటపడి పెట్టుకున్న పేరు "బాల గంగాధర తిలక్". ఆ తిలక్ కాస్తా మోడరన్ సాకుతో భ్రష్టు పడి టిల్లుగా మారి ఉంటుంది అని నా బుల్లి బఠాణీ సైజు బుర్రకు తట్టింది. సినిమా పేరులో టిల్లు ఏమిటో, మరేదైనా కారణమైతే విని తరిస్తాను. ఇక కథ. కథ కాసేపు రచయిత/ల అదుపులోనే ఉన్నది అనిపిస్తుంది. కానీ, కథ స్క్రీన్‌ప్లేలకు కర్త ఒకరు కాదూ, ఇద్దరూ అని చివర వచ్చే క్రెడిట్స్‌లో కనిపెట్టాను. ఒకరు ఆ సినిమా దర్శకుడు విమల్ కృష్ణ రెండవవారు ఆ సినిమా హీరో జొన్నలగడ్డ సిద్దు. వారి కథా రచన ఏ నిష్పత్తిలో జరిగిందో తెలియదు కానీ, సినిమాలో కొంతసేపటికి, అంటే "బ్రేక్" కు చాలా ముందే, కథ, తన ఇష్టం వచ్చినట్టు స్వారీ చేస్తూ రచయితలను తన వెంట పరుగు పెట్టేట్టు చేసేసుకున్నది. కథ ఎన్ని వంకర టింకరలు తిరిగిపోయినా, చివరలో ఎలాగోలా ఆ "లూజ్ ఎండ్స్" అన్నీ (అలా ఉన్నాయన్న గ్రహింపే రచయితల గొప్పతనం) కలిపే విఫల ప్రయత్నం చేశారు కానీ నప్పలేదు. అందుకే రెండో భాగం! Or, are they planning to make movies like Carry on Series! Even in Carry on Series, each movie ends but does not carry the story to the next one in the series. ఒక మాట మాత్రం తప్పక చెప్పాలి, ముగింపు నాకు సంతృప్తిని ఇవ్వలేదు. అర్ధాంతరంగా ఆగిపొయ్యింది అనిపించిది. ఈ సినిమా చివరలో పార్ట్-1 అని వేశారు, రెండో భాగంలో ముగింపు ఇస్తారా!? తెలియదు. కానీ, సినిమాలు ఏ భాగానికి ఆ భాగం చూసుకునే వీలుండేట్టుగా, కనీసం మొదటి భాగం చేస్తే బాగుంటుంది. కారణం, టివి సీరియళ్ళలాగా సినిమాలు ఎప్పటికీ తియ్యలేరు, పైగా ఆ రెండో భాగం ఎప్పుడు తీస్తారో, అసలు తీస్తారో లేదో కూడా అనుమానమే. అందుకని ప్రేక్షకులను అటువంటి కష్టంలో పడెయ్య కూడదు అని నా భావన. సినిమా తప్పకుండా చూడండి. ఎందుకు చూడాలి అని అడిగితే:
  1. ఈ సినిమా, ఆంగ్లంలో చెప్పాలి అంటే, "ఫ్రెష్" గా ఉన్నది
  2. టేకింగ్ బాగున్నది
  3. డైలాగులు బాగున్నాయి, కౌంటర్ కౌంటర్ అని ఊరికే కావాలని వేసినట్టు కాకుండా సందర్భ శుధ్ధితో బాగున్నాయి. సినిమా విజయానికి కారణం, నేను అనుకోవటం, ప్రేక్షకులకు, ముఖ్యంగా ఈనాటి తరానికి రొడ్డ కొట్టుడు ప్రేమ కథల మీద మోజు తగ్గటం అనే కంటే అసలు మోజు ఏర్పడకపోవటం అని చెప్పాలి. ఆ తరువాత, ఒకప్పటి ప్రొఫెషనల్ దర్శకుల తీరు, ఈ కొత్త తరానికి అసలేమాత్రం నచ్చకపోవటం. ఆ కారణాన, ఈ తరం, కుర్ర ప్రేక్షకులు, (ముఖ్యంగా చదువుకుని ఉద్యోగాలు చేసుకుంటున్న) దర్శకులు, తమ వయస్సువారయ్యి, సమకాలీన సమాజ పరిస్థితులలో, యువ ప్రేక్షకులకు తెలిసిన కొన్ని నిజాలు ప్రతిబింబించే సినిమాలను తీస్తే ఆదరిస్తున్నారు, అని ఈ మధ్య వచ్చిన సినిమాలు, ముఖ్యంగా ఓటిటి(OTT)లో వచ్చే సినిమాలును చూస్తే తెలుస్తున్నది. ఇది నాకు అనిపించిన కారణం. ప్రేక్షక టేష్టు మారటం, ముఖ్యంగా తెలుగు ప్రేక్షక టేష్టు మార్పు, హీరో వర్షిప్ నుంచి, బయటపడి మంచి సినిమా వైపుగా మళ్ళటం, సినీ ప్రియులు, ఎంతగానో స్వాగతించవలసిన విషయం. ఈ సినిమా దర్శకుడు, రచయిత కథ విషయంలో మరింతగా కష్టపడాలి, ఇంకా బాగా హోం వర్క్ చెయ్యాలి. టేకింగ్ బాగున్నది కానీ, టెంపో మీదే ఎక్కువ దృష్టిపెట్టకూడదు, కథను సజావుగా సాధ్యమైనంత రియాలిటీకి దగ్గరగా నడపాలి అని నా సూచన. కుర్రవాళ్ళయిన దర్శకుడు, హీరో లకు నా అభినందనలు. సిధ్ధూ సినిమా "గుంటూర్ టాకీస్" మునుపు చూశాను. అతని నటన ఒక మూసలో పడిపోతున్నట్టుగా అనిపిస్తున్నది. తగిన జాగ్రత్త తీసుకోవాలి. ఇక సినిమాలో నటీనటులు నా దృష్టిలో బాగా చేసిన వారు, సినిమా Freshnessకు తోడ్పడినవారు: సిధ్ధూ తండ్రిగా వేసినాయన ముఖంలో ఒక్కటే ఎక్స్‌ప్రెషన్‌తో (అక్కడక్కడా తప్ప) హాస్యం బాగా పండించారు. జంధ్యాల గారి నిర్వచనం ప్రకారం, నవ్వించేవాడు నవ్వకూడదు. కాకపోతే, ఆయన ముఖ కవళికలు, ఆకారం చూస్తుంటే బాల గంగాధర్ తిలక్ మీద భక్తితో తన కొడుక్కు ఆ పేరు పెట్టుకునే వాడిలా కనపడలేదు. ఒక విషయంలో దర్శకుడిని తప్పకుండా అభినందించాలి. ఈ పాత్రకు తనికెళ్ళ భరణిని ఎంచుకోకపోవటం. నేను అలా అనటం, భరణిగారు తక్కువ నటుడు అని కాదు. ఆయన ఈ తండ్రి వేషం వేసి ఉంటే, ఇప్పటికే ఆయన్ను అలాటి పాత్రల్లో చూసి చూసి మొనాటనీ (విసుగు) వచ్చేసింది. Thank You విమల్. తరువాత జడ్జి పాత్ర వేసినావిడ, ఆవిడ నటన సరదాగా ఉన్నది, బాగున్నది. సినిమాలో ఒకచోట సిధ్ధు తల్లి చీపిరి కట్టతో విలన్ గాళ్ళను తన్ని తరమటం, ముఖ్యంగా ఆ తన్నటానికి కారణం. భలేగా ఉన్నది. తండ్రి పాత్రలో ఉన్నాయన అక్కడ ఒక సెకండ్‌లో భలే ఎక్ష్ప్రెషన్ ఇచ్చాడు, చచ్చేంత నవ్వు వచ్చింది. ఇక చాల్లే, మరీ ఇంత రాస్తే ఎలా అనుకుంటున్నారు కదూ. అవును మరీ ఎక్కువయ్యింది అని నాకే అనిపిస్తున్నది. ఇక వీలైతే సినిమా చూడండి. మంచి సినిమాలు తీసే దర్శకులను వారి మొదటి ప్రయత్నంలో బాగా తియ్యటానికి ప్రయత్నించినట్టు కనపడినా చాలు ఆదరించాలి. అందుకే ఈ సినిమా చూడాలి.




12, మే 2021, బుధవారం

మీడియా తెంపరితనం ఆపలేమా!?



గత దశాబ్దం దశాబ్దంన్నరలో ఇబ్బడి ముబ్బడిగా టివి వార్తా చానెళ్ళు వచ్చేసి, వారి వారి పనితీరుతో జర్నలిజంకు ఇంకా మిగిలి ఉందనుకునే పరువును పూర్తిగా పోగొట్టి ఇంకా కిందకు కిందకు తీసుకు వెడుతున్నాయి. టివి న్యూస్ చానేళ్ళు చేసే దౌర్భాగ్యపు పనుల్లో అతికొద్దివి-అసలు వార్తే కాని దాన్ని రుద్ది రుద్ది చూపటం, వార్తలను చూపటంలో కూడ విపరీతమైన పక్షవాతం, సారీ పక్షపాతం, టివి చర్చల పేరిట కేకలు, అరుపులు, పానలిష్టులు చెప్పులు విసురుకోవటం కూడా కొరియోగ్రఫి చెయ్యటం వంటివి.

దురదృష్టవశాన ఎక్కడన్నా ఒక విషాద సంఘటన జరిగితే చాలు, రాబందుల్లా వాలిపోయి ఇది చూపొచ్చు ఇది చూపకూడదు అనే ఇంగితం లేకుండా చితికిపోయిన మృతదేహాలను, పారుతున్న నెత్తురును కూడా చూపిస్తూ, బాధితులు పాపం వాళ్ళ దీన గాధ చెప్పుకుంటూ మొత్తుకుంటూ ఉంటే కెమెరాను వాళ్ళ కళ్ళ దగ్గరకు జూం చేసి కన్నీళ్ళను ఎలాగోలాగా కెమెరాలో బాగా చూపాలన్న పిచ్చ వంటివి మన సమాజంలో సవ్యంగా ఆలోచించగల వాళ్ళు అందరూ ఈసడించుకుంటున్నారు. కొందరు వారి కోపాన్ని అసహ్యాన్ని న్యూస్ చూడటం మానేసి చూపుకుంటున్నారు.

కానీ ఈ మొత్తానికి ఒక కీలకం ఉన్నది. ప్రజలకు ఏవగింపు కలిగించే వార్తలను, అభ్యంతరకర దృశ్యాలను చూపినప్పుడు, ఆ సెగ్‌మెంట్ ఏ కంపెనీ స్పాన్సర్ చేసిదో గమనించి, మనం అందరం కూడ జష్ట్ ఒక్క కార్డ్ వ్రాసి లేదంటె ఒక ఈ మైల్ ఇచ్చి, ఆ కంపెనీ చైర్మన్ కు మన కోపాన్ని తెలియచెయ్యటమే కాదు, ఆ కోపం ఎందుకు వచ్చిందో వ్రాయాలి. మీరు ఇటువంటి చెత్త చానెల్ కు మీ వస్తువుల యాడ్లు ఇచ్చారు కాబట్టి, మాకు బాధ కలిగించే విషయాలు చూపటంలో మీది కూడా బాధ్యత ఉన్నదని భావిస్తూ, ఒక నెలపాటు మీ ప్రొడక్ట్లు కొనము అని నిజంగా కొనకుండా ఉండాలి. ఇలా రోజుకు ఒక వంద కార్డ్‌లు/ఈ మైళ్ళు ఆయా కంపెనీలకు వెడుతుంటె, వాళ్ళు చూస్తూ ఊరుకోలేరు కదా. అప్పుడు వాళ్ళు మేల్కొని ఈ చానెల్ వల్ల మనకు లాభం లేదు నెగెటివ్ ప్రచారం జరుగ్తున్నది మన అమ్మకాలు పడిపోతున్నాయి అని ఆ చానెల్ కు యాడ్లు ఆపుతారు. తద్వారా ఆ చానెల్ కు ఆదాయంలో గండిపడి కనీసం అప్పుడు జరిగినది తెలుసుకుని తమ నడవడి మార్చుకుంటే, బాగుపడుతుంది లేదంటే కూలిపోతుంది. దురదృష్టవశాత్తూ అటువంటి చైతన్యం ప్రేక్షకులలో లేదు. అందుకనే చానెళ్ళకు ఆడింది ఆటగా ఉన్నది.

మనం, అంటే ప్రేక్షకులమైన మనం కొంత శ్రమ తీసుకుని, అది కూడా పెద్ద శ్రమేమీ కాదు ఒక్క నిమిషం దృష్టిపెట్టి పైన చెప్పిన విధంగా మన అభిప్రాయాన్ని ఆ చానెల్ కు యాడ్లు ఇచ్చిన కంపెనీ/ల కు వ్రాయటం మొదలుపెడితే ఏమవుతుంది? చానెల్ ఆదాయానికి గండి పడుతుంది అప్పుడు వాళ్ళు విషయం తెలుసుకునే అవకాశం ఉన్నది, బాగుపడేవాడు పడతాడు లేనివాడు కాలగర్భంలో కలిసిపోతాడు, ఏతావాతా వార్తా చానెళ్ళ నాణ్యం పెరిగే అవకాశం ఉన్నది.

ఏ వస్తువు కానీ/సేవ కానీ నాణ్యంతో పనిలేకుండా ఎగబడి వాడుకునేవాళ్ళు ఉంటే అది తయారుచేసే వాళ్ళకు (ఇక్కడ వార్తా చానెళ్ళూ) తమ వస్తువు/సేవ బాగుచేయ్యాలన్న ఇంగితం కాని అవసరం కాని ఎందుకు కనపడుతుంది? కలగదు. కాబట్టి మనమే, అవును మనమే ఆ "రిపైర్" కు పూనుకోవాలి.

ఇక్కడదాకా చదివిన వారికి నా ధన్యవాదాలు. మీరు వెయ్యిలో ఒకళ్ళు అయ్యి ఉంటారు. చాలెంజ్ గా చెబుతాను, నేను వ్రాసిన ఈ నాలుగు మాటలూ ఏ చానెల్ అన్నా వారి చర్చా కార్యక్రమంలో చర్చా విషయంగా పొరబాటున కూడా తీసుకోదు, ఏ వార్తా పత్రికా ప్రచురించదు. కారణం అందరినీ విమర్శించే మీడియా తమ మీద విమర్శను సీరియస్ గా తీసుకోదు/పట్టించుకోదు. అసలు అది విమర్శే కాదన్నట్టుగా అలాంటిది ఏమీ లేదన్నట్టుగా ఉష్ట్ర పక్షి తంతుగా వ్యవహరిస్తుంది. ఈ కారణమే కాలక్రమేణా మీడియాకు విషంగా మారి దహించివేస్తుంది. 

12, సెప్టెంబర్ 2018, బుధవారం

వినాయకుడి ఆవేదన

ప్రతి వినాయక చవితికి కొంత కాలం ప్రత్యెక వ్యాసాలను వ్రాశాను. ఒకటి రెండు సంవత్సరాలు వ్రాయలేదు. ఈ సంవత్సరం, వ్యాసం వ్రాయనవసరం లేకుండా ఒక చక్కటి వీడియో దొరికింది. వెర్రి మొర్రి భక్తితో వినాయకుడు ఎంతగా ఆవేదన చెందుతున్నాడో, ఈ వీడియోలో చక్కగా వ్యక్తపరిచారు. ఈ వీడియో చూడటమే కాదు, అందులో చెప్పిన విషయాల గురించి ఆలోచించి,  వినాయక చవితి పండుగను సవ్యమైన పద్ధతిలో జరుపుకుంటే పుణ్యం. 




=======================================================================
ఇంట్లో చక్కటి మట్టి విగ్రహాలు పెట్టుకుని, పత్రిలో కావలిసిన ఆకులలో ఎక్కువ భాగం ఇంట్లో పెంచుకున్న చెట్ల నుండి తెచ్చుకుని  వినాయక చవితి చేస్తున్న వారికి జిందాబాద్

*****************************************************
అల్లరి, ఆగం లేకుండా, మట్టి వినాయకుడితో,  పూజ చేసుకునే అందరికీ  వినాయకచవితి శుభాకాంక్షలు
*****************************************************



మునుపువినాయకచవితికిచేసేఅకృత్యపు పూజలగురించివ్రాసినవ్యాసాలు


2009
2010
2010
2010
2011
2011
2012
2013
2014
వ్యాసం వ్రాయలేదు (విసుగెత్తి)
2015
పున:శ్చరణ మాత్రమె    కొత్త వ్యాసం వ్రాయలేదు !
2016
వ్యాసం వ్రాయలేదు (విసుగెత్తి)
2017