కామన్వెల్త్ ఆటలు అక్కడే ఆడాలా

కామన్వెల్త్ ఆటలపోటీ ఢిల్లీలోనే ఆడాలా? అలాంటి ఆటల పోటీలునిర్వహించటానికి ప్రత్యేక స్టేడియంలు వగైరా కొత్తవి కట్టి తీరాల్సిందేనా? మనదేశం ఏమన్న చిన్నదా స్టేడియాలు లేకుండా గొడ్డుపోయిందా! ఎన్ని నగరాల్లో ఎన్నెన్ని స్టేడియంలు లేవు! ఈ ఆటలను దేశవ్యాప్తంగా ఒక 25 నగరాలను (పెద్దనగరాలతో పాటుగా చిన్న నగరాలను కూడ) ఎంపిక చేసుకుని మనకి ఇప్పటికే ఉన్న స్టేడియాల్లో ఎందుకు నిర్వహించకూడదు. ఒక్కో రకమైన పోటీ ఒక్కో నగరంలో నిర్వహించటం, చివరి ఫొటీలు మరొక నగరంలో, ఇలా ఒక చక్కటి పథక రచన చేసి అనేక నగరాలో ఉన్న ప్రజలు చూసి ఆనందించేట్టుగా ఎందుకు ఈ ఆటలపోటీని నిర్వహించరు??

కామన్వెల్తు ఆటలపోటీ నియమాల్లో పోటీలు ఏమైనా సరే ఒక్కచోటె నిర్వహించాలని శిలక్షరాలు లిఖించారా ఏమిటి??!!!

ఇన్ని కొత్త స్టేడియాలు (ఎప్పుడు కూలతాయో తెలియని) కట్టారుకాని, క్రికెట్ పిచ్చెక్కువగా ఉన్న మన దేశంలో ఈ ఆటలను చూడటానికి ప్రేక్షకులు ఎంతమంది వస్తారు? లక్షలాది మంది ప్రేక్షకులు తిలకించిన క్రికెట్ ప్రపంచ కప్ పోటీలను నిర్వహించి నప్పుడు ఇలా కొత్త స్టేడియాలు కట్టినటు లేదే! అన్ని ఆటలు దేశవ్యాప్తంగా అప్పటికే ఉన్న స్టేడియాలలో ఆడారుకదా. ఇపుడీ కొత్త ఖర్చు దేనికి. ఎవరికోసం.

ఆటగాళ్లకు ఆతిధ్యమివ్వటానికి దేశవ్యాప్తంగా ఎన్నెన్ని 3స్టార్, 5 స్టార్ హోటళ్ళు లేవు, ఆ వచ్చే ఆటగాళ్ళ కోసం ఒక్కచోటే (నాసిరకపు) గదులు కొత్తగా కట్టాలా.

ఏమిటో ఇదంతా మీడియాలో ఒక్కొక్కటిగా బయటపడుతున్న కామన్వెల్త్ గేముల నిర్వహణా లోపాలు చూసి/చదివి, సామాన్యుని సణుగుడేకాని, ప్రజలచేత ఎన్నికయ్యామన్న జ్ఞానమే లేకుండా రాజులు యువరాజులు లాగ ప్రవర్తించే ఈ రాజకీయ నాయకులకు ఏమన్నా పట్టిందా?? పైగా తాము చేసిన ఏర్పాట్లే గొప్పగా ఉన్నాయని నిస్సిగ్గుగా డంబాలు పలకటం. చివరకు దేశ ప్రధాని, ఈ చిన్న విషయంలో ప్రత్యెక సమావేశం ఏర్పాటు చేసి సమీక్షించాల్సిన గతి పట్టింది అంటే, పరిస్తితి ఎంత దారుణం ఉండి ఉంటుందో ఊహించుకోవచ్చు.

ఈ ఆటల పుణ్యమా అని డిల్లీ రోడ్లన్నీ తవ్వి పారేశారట. దాంతో అనేక చోట్ల టెలిఫోన్ లైన్లు తెగిపోయి, పేటలకు పేటలు టెలిఫోన్ సౌకర్యం లేకుండా బాధపడుతున్నారు. కొన్ని కొన్ని వ్యాపార సముదాయాల్లో, వినియోగదారుడు తన దగ్గర ఉన్న క్రెడిట్ కార్డ్/ఏ టి ఎం కార్డు వాడితే, టెలిఫోన్ కనెక్షన్లు లేకపోవటంతో ఆ కార్డులద్వారా అమ్మకాలను పూర్తిచేసుకోలేక, అమ్మకాలు పడిపోయి వ్యాపారులు గగ్గోలు పెడుతున్నారట .

కామన్వెల్త్ ఆటల పోటీలు 2014లో గ్లాస్గో నగరంలో జరిగే ఆవకాశం బాగా ఉన్నదట . బ్రిటిష్ వారు ఆ ఆటలను ఎలా నిర్వహించినా సరే (వాళ్ళు ఎలాగో అద్భుతంగా నిర్వహిస్తారు) రెండు పోటీలు చూసినవారు, గ్లాస్గో గేములనే మెచ్చుకునేట్టుగా చేసే ప్రయత్నం గా ఉన్నది ఈ వ్యవహారం అంతా కూడ. మన రాజకీయ నాయకులు, వారి తాబేదార్లైన కాట్రాక్టర్లు కలిసి, తమ దురాశ, అవినీతితో రాబొయ్యే గ్లాస్గో గేములనే అందరూ మెచ్చుకోవటానికి చక్కటి పునాది వేస్తున్నారు.

ఇలా ఆటల పోటీకి ప్రత్యేక గ్రామాలను కోట్లు తగలేసి నిర్మించటం ఎవరికోసం, కాట్రాక్టర్లు, రాజకీయ నాయకులు వారికున్న ఎడతెగని ధనదాహం తీర్చుకోవటానికే అనిపిస్తున్నది.

ఏది ఏమైనా మనదేశ ప్రతిష్టకు ముడిపడి ఉన్న ఈ ఆటల పోటీలు, మిగిలిన ఈ కొద్ది రోజులలో ఐన, కొంత పాటుపడి, కొంతలో కొంత నిజాయితీ చూపించి, సవ్యంగా నిర్వహిస్తారని ఆశిద్దాం.

***************