ఏ క్షణానికి ఏమి జరుగునో...

కీర్తి శేషులు శ్రీ బి రామకృష్ణ

వారం పైగా బ్రిటిష్ లైబ్రరీకి వెళ్ళటమే కుదరలేదు. నిన్న వెళ్ళీ వెళ్ళగానే దుర్వార్త తెలిసింది. లైబ్రరీకి వచ్చే అందరు సభ్యులనూ నవ్వుతూ పలకరిస్తూ, కావలిసిన పుస్తకాలు, మాగజైన్లు, డివిడిలు అందిస్తూ స్నేహపాత్రంగా ఉంటూ ఉన్న సహాయక లైబ్రేరియన్ శ్రీ బి రామకృష్ణ ఏప్రిల్ 12 వ తారీకున హటాత్తుగా గుండెపోటుతో మరణించారని తెలిసింది. దాదాపు వారానికి ఒకటి రెండుసార్లు కలుసుకునే మనిషి ఇలా ఐపోయారని తెలిసి కొంతసేపు మాటరాలేదు. శ్రీరామనవమి రోజున పొద్దున్నే పూజచేసుకుని కూచుని ఉండగా ఛాతీలో నెప్పి రావటం హాస్పిటల్ తీసుకు వెళ్ళేలోపల అంతా అయిపోవటం జరిగిపోయిందట.

శ్రీ రామకృష్ణ బ్రిటిష్ కౌన్సిల్ లైబ్రరీలో 1978 నుండి తన సేవలను అందిస్తూ ఉన్నారని తెలుస్తున్నది. అంటే తన ఇరవై ఒకటో సంవత్సరపు వయస్సు నుండి ఆయనకు అదే లోకం, ఒక్కటే ఉద్యోగం. (మా) పాత తరానికి చెందిన మనిషి శ్రీ రామకృష్ణ. ఏదో ఉద్యోగ ధర్మంగాకాకుండా వచ్చిన అందరితో హాయిగా మాట్లాడుతూ ఎప్పుడూ పుస్తకాలు ఎక్కడ ఉండాల్సినవి అక్కడ ఉంచుతూ వచ్చి అడిగిన వారికి అవి ఉండే షెల్పులు చూపిస్తూ బిజీ బిజీగా ఉండేవారు.

శ్రీ రామకృష్ణ ఆత్మకు సదా శాంతి కలగాలని, ఆయన లేని లోటు తట్టుకునే శక్తి ఆయన కుటుంబానికి భగవంతుడు ఇవ్వాలని బ్రిటిష్ కౌన్సిల్ లైబ్రరీ ఉద్యోగులు, లైబ్రరీ సభ్యులతోబాటుగా ప్రార్ధిస్తున్నాను.