ఒక ఆలోచన లేదా సూచన

ఆవతలి వాడు చెప్పేది, ఆ విషయం మనకు ఉపయోగపడేదే అయినాసరే, ఎందుకు వినాలి అన్న మొండితనం  చాలా మందిలో  చూస్తుంటాము.  ఇక్కడ పార్కింగు చెయ్యద్దు అంటే, అక్కడే డబుల్ పార్క్ చెయ్యటం, లేదా బైకు సైడు స్టాండు వేసి మరీ పార్క్ చేసే ప్రభుద్దుల్ని మనం రోజూ చూస్తూనే ఉంటాం. ఆఫీసుల్లో మెట్లమీద ఉమ్మెయకుండా, ఇక్కడ ఉమ్మకండిరా అని బోర్డు పెట్టినా సరే అక్కడే తమ చండాలపు అలవాట్లతో (కిళ్ళీలు,గుట్కాలు) ఆఫీసుల్లో గోడలు, మెట్లు నాశనం చేసేవాళ్ళను చూస్తూనే ఉన్నాము. ఈ చెత్త అలవాటు పోగొట్టటానికి మెట్ల మీద అన్ని రకాల మతాల బొమ్మలు పెట్టినవాళ్ళూ లేకపోలేదు. ఈ ఉమ్మెత్త గాళ్ళను ఆపటానికి దేముడు "భయం" తీసుకు రావలిసిందే కానీ , వాళ్లకు వాళ్ళే బుద్ధి తెచ్చుకుని ప్రవర్తిస్తారని  అనుకోవటం అత్యాశే!

ఇక డ్రైవింగు చేసేప్పుడు సెల్ మాట్లాడకండిరా , అది మీకే కాదు, మీ డ్రైవింగ్ వల్ల రోడ్డు మీద ఉన్న ఇతరులకు కూడా ప్రమాదానికి దారి తీస్తుంది, ప్రాణాలు పొయ్యే ప్రమాదం ఉన్నది  అని ఎన్ని చెప్పినా, ఫైను వేసినా, ప్రకటనలు గుప్పించినా, మనం రోజూ చూస్తూనే ఉంటాము,  బైకుల మీద వెళ్ళే వంకర మెడగాళ్ళని. ఏమిటో వీడు చేసే అణాకాణీ గుమాస్తా ఉద్యోగానికి, లేదా చేసే బటానీల వ్యాపారానికి అంత డ్రైవ్ చేస్తూ కూడా, అదీ బైకు మీద, మాట్లాడాల్సినంత గొప్ప విషయం. పక్కన ఆపుకుని ఆ అద్భుత విషయం మాట్లాడుకోవచ్చు కదా!

ఇక ఇప్పుడు హాండ్స్ ఫ్రీ ఫోను కారుకు అనుసంధించి, మాట్లాడేసుకోవచ్చు. డ్రైవింగ్ చేసేప్పుడు ఫోను మాట్లాడ కూడదు అన్నది, ఒక చేత్తో ఫోను పట్టుకుంటారని, ఒంటి చేత్తో డ్రైవింగ్ చేస్తే మాత్రమె ప్రమాదం జరుగుతుందని  కాదు. డ్రైవింగ్ చెయ్యటం అనేది ఎంతో జాగ్రత్తగా మన చెవులు, కళ్ళు, బుద్ది పెట్టి చెయ్యవలసిన పని. అటువంటి పనిచేస్తూ, ఫోను మాట్లాడుతుంటే, హాండ్స్-ఫ్రీ అయినా సరే, చెవులు/బుద్ధి మాట్లాడే విషయం మీద ఉంటాయి కానీ, డ్రైవింగ్ మీద ఉండవు. ప్రమాదం జరిగే అవకాశం చాలా ఎక్కువ.  కాబట్టి, డ్రైవింగ్ చేస్తున్నప్పుడు, ఏవిధంగానైనా సరే,   ఫోను మాట్లాడటం ప్రమాదకరమే. 

హాండ్స్-ఫ్రీ ఫోను వల్ల జరిగిన ప్రమాదం (క్లిక్ చేసి చూడండి)

ఇలాంటివి ఎన్ని జరుగుతున్నాయో!

డ్రైవింగ్ లో  సెల్ వాడకుండా ఉండటానికి నా దగ్గర కొన్ని ఆలోచనలు ఉన్నాయి.

1. సెల్ ఫోనులు హమేషా దగ్గరలో ఉన్న టవరుకు సిగ్నల్ పంపి(Send) మళ్ళీ తీసుకుంటూ(Receive) ఉంటాయి. అంటే ఒక సెల్ ఫోన్ ఒక టవర్ ప్రాంతంలో ఉండగా, మరో టవర్ ప్రాతానికి వెళ్ళే లోపల ఒక టవర్ నుంచే ఈ సిగ్నల్ పంపిణీ పనిచేస్తుంది. 
2. ఒక వ్యక్తి వాడే సెల్ ఫోన్,  ఒక టవర్ నుండి మరో టవరుకు తన సిగ్నల్ పంపటం మధ్య ఉండే వ్యవధిని లెక్కగట్, టి ఆ సెల్ ఫోన్ ఎంత వేగంగా ప్రయాణిస్తున్నదో  గమనించి, ఆ వేగం ఐదు కిలోమీటర్ల కంటే ఎక్కువగా ఉంటే, ఆ సెల్ ఫోను నుంచి కాల్స్ వెళ్ళటం కాని, రిసీవు చేసుకోవటం కాని  లేకుండా ఆపేసే ప్రత్యెక ఏర్పాటు చెయ్యాలి. అలాగే ఒక టవర్ పరిధిలోనే ప్రయాణిస్తున్నా కూడా, ఆ సెల్ ఫోను కదలిక వేగాన్ని ఆ టవర్లో పసిగట్టే ఏర్పాటు చెయ్యాలి. ఈ ఏర్పాటును ఓవర్ రైడ్ చెయ్యటానికి ఏ విధయమైన అవకాశమూ ఫోనులో ఇవ్వకూడదు.   ఈ విషయంలో టెక్నికల్ గా తెలిసిన వాళ్ళు ఆలోచిస్తే బాగుంటుంది.
3. సరే, మాకు అబ్బో ఎంతో జరూరు పనులు ఉంటాయి అనుకునే వాళ్ళ కోసం ఏర్పాటు ఏమంటే, వాళ్లకు ఇన్వర్డ్ కాల్ వస్తుంటే, ఒక్క ప్రత్యెక మైన బీప్ రావాలి . ఆ బీప్ రాగానే అది వాళ్లకు ఒక ఇన్వర్డ్ కాల్ వస్తున్నట్టు సంకేతం అన్న మాట. అప్పుడు వాళ్ళు ప్రయాణిస్తున్న వాహనాన్ని పూర్తిగా ఆపితేనే, వాళ్ళు ఆ ఇన్వర్డ్ కాల్ తీసుకోగలగాలి. 
4. అలాగే, ఒక వ్యక్తికి మనం కాల్ చేస్తుంటే, ఆ వ్యక్తి అప్పుడు ప్రయాణం చేస్తూ ఉంటే (ప్రయాణం చేస్తున్నదీ లేనిదీ పాయింటు 1  లో సెల్ టవర్ కు  తెలుస్తుంది), మనకు ఒక మెసేజీ రావాలి, ఆ వ్యక్తి ప్రయాణం లో ఉన్నాడు, కాసేపాగి చెయ్యండి. మరీ అర్జెంటు అయితే, ఫలానా  బటన్ నొక్కండి. అలా నొక్కగానే పైన చెప్పిన బీప్ ఆ వ్యక్తికి వస్తుంది. అతను వాహనం ఆపి ఆ ఇన్వర్డ్ కాల్ తీసుకుంటాడు.
5. ఈ వ్యవహారంలో, ప్రయాణిస్తున్నప్పటికీ, డ్రైవ్ చెయ్యకుండా వెనుక కూచున్న వాళ్లకి, లేదా రైలు/బస్సు లో ప్రయాణిస్తున్న వాళ్లకి ఏవిధంగా అడ్డంకి కాకుండా ఉండాలి అని  చూడాలి.ఈ పాయింటు కొచెం కష్టమైనది. కానీ ఆలోచిస్తే ఉపాయం దొరక్కపోదు.

ఒక దురలవాటును, పైగా ఆ దురలవాటున్న వ్యక్తికే కాదు, ఆ వ్యక్తివల్ల ఇతరుల ప్రాణానికి కూడా ముప్పు ఉన్నప్పుడు, ఆ విషయం మీద తప్పనిసరిగా ఒక విస్తృతమైన చర్చ జరిగి, అటువంటి ప్రమాదాలు జరగకుండా ఆపే ఉపాయాలు కనుక్కోవాలి కానీ,  ఆ దురలవాటును సమర్ధిస్తూ పిడివాదాలు చెయ్యకూడదు.






 

ప్రమాదాలు జరుగుతూనే ఉంటాయి

  ఇది మనకున్న సివిక్ సెన్స్!  

గేటులేని లెవెల్ క్రాసింగ్ వద్ద ఈ మధ్యనే జరిగిన ప్రమాదం గురించి ప్రముఖ జర్నలిస్టు ఆపైన బ్లాగర్ అయిన భండారు శ్రీనివాసరావు- వార్తా వ్యాఖ్యలో

( బండారు శ్రీనివాసరావుగారి బ్లాగ్ (క్లిక్) ) ఆయన సమస్యకు ఒక పార్శ్వం సమీక్షించారు. కాని  నా ఉద్దేశ్యంలో ప్రస్తుతపు రోజుల్లో యధా ప్రజా తథా నాయకా గా ఉన్నది. చాలావరకూ మనబట్టే నాయకులూనూ, మనకు తగ్గ నాయకులే వస్తారు కాని, మనకు భిన్నంగా ఉండే నాయకులు ఎప్పటికీ రారని నేను నమ్ముతున్నాను. ప్రజల్లో అంటే వేరెవరో మనకు తెలియని వాళ్ళు కాదు "మనమే" సవ్యంగా బ్రతకటం నేర్చుకోకుండా క్రమశిక్షణా రాహిత్యంతో బాధపడుతూ పైగా ఆ క్రమశిక్షణా రాహిత్యమే గొప్ప లక్షణంగా పిడివాదాలు చేసేస్తూ, మన్ని తప్ప ఇతరులందరినీ విమర్శిస్తూ బతికేస్తే ప్రమాదాలు, స్కాములు జరగకుండా ఆగవు. జరుగుతూనే ఉంటాయి మరి!

సివిక్ సెన్స్ అనేది వినటానికి కూడా ఇష్టపడని జాతి అయ్యిపోయింది మనది.

గేటు ఉన్న చోట స్కూటరు మొత్తం ఆ గేటు కిందనుంచి దూర్చి, వెనకాల పెళ్ళాం పిల్లలు, (చిన్న చిన్న పిల్లలు కూడా) నడిచి వస్తుంటే రైలు వస్తున్నా చూసి కూడా పట్టాలు దాటే మగ ధీరులు ఎంతమంది మనకు! అలాంటి తండ్రుల నుంచి ఆ పిల్లలు నేర్చుకునేది ఏమిటి? విజయవాడలో 1989లో అనుకుంటాను ఒక ప్రముఖ జర్నలిస్టు కుమార్తె, వేసి ఉన్న రైల్వే గేటులోంచి తన మోపెడ్ తో దూరి వెళ్ళాలని పోయి రైలు కిందపడి మరణించింది. గేటు ఉండి ఉపయోగం ఏమిటి? సివిక్ సెన్స్ అనేది లేకపోవటం ఎంతో ప్రమాదం. ఇవ్వాళ లైన్లో నుంచోరా అంటే వెటకారం, వాహనాన్ని సరిగ్గా పార్క్ చెయ్యరా అంటే పొగరుమోతు సమాధానాలు, రెడ్ లైటు ఏరియాకు వెళ్ళటం మగతనమట (దాని వాల్ల ఎన్ని ప్రమాదాలున్నా సరే!),  కాని రెడ్ లైటు దగ్గర ఆగటం (అలా ఆగటం ఎంత సేఫ్టీ ఐనా సరే!) మగతనం కాదట, ఇలాంటి వాళ్ళకు ప్రమాదాలు కాక మరేమి వస్తాయి?

రైల్వే వాళ్ళను విమర్శించే ముందు, మనం అంటే సామాన్య ప్రజలం ఏమి చేస్తున్నాము ముందు చూడాలి. ఆ ప్రమాదం జరిగిన ఊళ్ళో గేటు ఉన్న లెవెల్ క్రాసింగ్ వదిలి దగ్గిర దారి అన్న మిషతో, ఆ డ్రైవరు గేటు లేని లెవెల్ క్రాసింగ్ మీదుగా తీసుకు వెళ్ళటం వలన మాత్రమే ఈ ప్రమాదం జరిగింది. స్కూలు వాళ్ళకు, తల్లి

తండ్రులకూ ఈ విషయం మునుపు తెలియదా? ఘోరం జరిగిపోయినాక నెత్తి కొట్టుకుంటూ ఏడిచి ఏమి లాభం! మన పిల్లలను పంపింస్తూ ఉంటె అక్కడ జరిగేది ఏమిటి అని అప్పుడప్పుడన్నా చూసుకోవాల్సిన బాధ్యత, కనీసం "భయం" తల్లి తండ్రుల్లో ఉండాలి. వాళ్ళైనా తమ పిల్లలలను తీసుకు వెళ్ళే వాహనాలను ఆకస్మికంగ తణిఖీ చెయ్యాలి ఎవన్నా అటూ ఇటూగా ఉంటే స్కూలు వాళ్ళను, బస్సు వాణ్ణి నిలదియ్యాలి. వీటికి మనకు టైము లేదు, చెయ్యాలన్న ఇష్టమూ ఆసక్తీ రెండూ లేవు. అంతా గుడీ గుడీ ఇచ్చకాల మాటలు అంతే.

ఇక స్కూలు వాళ్ళు తమ వాహనాలను ఏ రూటులో తీసుకు వెళ్ళాలి అన్న విషయం మీద కఠినంగా ఉండి ఉంటే ఈ ప్రమాద జరిగేదే కాదు. ప్రతి లెవెల్‌క్రాసింగ్ వద్దా గేటు ఉండాలి, కాని రైల్వే టిక్కెట్ రేట్లు మటుకు

పెంచకూడదు (పదకొండేళ్ళ తరువాత ఈ మధ్య పెంచితే ఎంత గోల చేశారు!) ఎలా కుదురుతాయి. ఆకాశంలోంచి డబ్బులు వచ్చి ఈ పనులన్నీ జరుగుతాయా లేకపోతే ఏదన్నా మాయాజాలంతో జరిగిపోతాయా! దేశంలో గేట్లు లేని లెవెల్ క్రాసింగులన్నిటి మీదుగా ఫ్లై ఓవర్లు లేదా గేట్లు నిర్మించటనికి కావాలిసిన నిధులను సమకూర్చుకోవటానికి, ప్రభుత్వం బాండ్లు 5% వడ్డీతో విడుదల చేస్తే, టాక్స్ బెనిఫిట్ తో సహా,  ఎంతమందిమి కొంటాము? పక్కనున్న 12% వడ్డీ ఇచ్చే "మన" కులం వాడు నడిపే చిట్ ఫండులో పెట్టి మోసపోవటానికి రెడీ కాని, ఇలాంటి బాండ్లు ఒక మంచి పనికి ప్రభుత్వం తీసుకు వస్తే ఎవ్వరన్నా పెట్టుబడిపెడతారా!

ముఖ్యంగా మన "జాతి" కి కావలిసినది క్రమశిక్షణతో "ఆలోచించటం", సివిక్ సెన్స్ అలవరచుకోవటం. ఈ రెండూ లేకుండా బేకారు మాటలు మాట్లాడుకుంటూ, పొద్దు గడవని వాళ్ళ టివి పానెల్ డిస్కషన్సు వల్ల  ఉపయోగం ఏమన్నా ఉన్నదా! అతి విలువైన విద్యుత్ వృధా,  పైగా ఆ విద్యుత్ ను మనకు తిండి పెట్టె రైతుకు ఇవ్వకుండా (మనకు తిండి పండించే పోలాలకు నీళ్ళు పెట్టుకోవటానికి), మనకు టి వి  చూట్టానికి ఇవ్వటమేమిటి నాగరిక(!) ప్రపంచంలో జరిగే అనాగరిక చర్య కాకపోతే.  సామాజిక బాధ్యత అని ఊహూ  ఊదరగొట్టే చానెళ్ళు,   విద్యుత్ సమస్య  తీరేవరకూ వాళ్ళ ప్రసారాలను రోజుకు 3-4 గంటలకు పరిమితం చెయ్యలేరా! చెయ్యరు కారణం సామాజిక బాధ్యత ఇతరులది మాత్రమేట. 

 (ఫొటోలన్నీ గూగులమ్మ ప్రసాదం, ఎవరన్నా  నేను తీశాను  ఇక్కడ ఈ బ్లాగులో ప్రచురించటానికి  వీల్లేదు అని చెప్పగలిగితే, తక్షణం తొలగిస్తాను)  

అందరి పిల్లలూ ఇలా ఉంటే !

కపిల్ దేవ్ కుమార్తె అమయ దేవ్, కపిల్ దేవ్ కామెడీ విత్ కపిల్ కార్యక్రమంలో

 చివరిదాకా చదివిన వారికి ఒక బోనస్ ఉన్నది 

 ఈ నాటి పిల్లలే రేపటి పౌరులు అని పొడి పొడి మాటలు మాట్లాడుకోవటమే కాని, మన పిల్లలను రేపటి పౌరులుగా తీర్చి దిద్దటానికి మనం అంటే  తల్లితండ్రులం ఎంత ప్రయత్నిస్తున్నాము అని ఒక సారి ఆలోచిస్తే, తక్కువేనేమో అనిపిస్తుంది . ఒక ఎవరేజి తల్లి తండ్రులు చేసేది  ఏమిటి! ట్యూషన్ కార్ఖానాల్లో తమ పిల్లలను చేర్చేయ్యటం, వాళ్ళను కూచో నివ్వకుండా నుంచో కుండా ఊరికే తరమటం తోమటం,రాంక్, రాంక్  అని పాపం పిల్లలకు పిచ్చులు ఎక్కించటం,  ఆపైన అమెరికా తాయిలం చూపించటం, చివరకు వృద్ధాశ్రమంలో పడినాక ఆలోచన!

ఇవ్వాల్టి పిల్లలకు  దేవుడు ఇచ్చిన వరం కావచ్చు, కొంతమంది తల్లి తండ్రులు  వాళ్ళను పెంచిన విధానం కావచ్చును, అద్భుతమైన "ఏటిట్యూడ్"  తో వాళ్ళ జీవనాన్ని కొనసాగించి ఇతరులకు మార్గ దర్శకులు అవుతున్నారు. 

ఇలా వ్రాయటానికి స్పూర్తి కపిల్  దేవ్ కుమార్తె! అప్పటికే రికార్డ్ చెయ్యబడి తీరిక దొరికినప్పుడు చూడటానికి దాచిన (కర్టెసీ టాటా స్కై) కామెడీ విత్ కపిల్ కార్యక్రమాలు నిన్న శనివారం  కావటంతో సావకాశంగా నాకు నచ్చినవి చూశాను. అందులో నాకు బాగా అద్భుతం అనిపించినవి సునీల్ గవాస్కర్ తో ఆపైన అంతకంటే కపిల్ దేవ్ తో  కార్యక్రమం. ఆ ప్రోగ్రామ్ యాంఖర్ పేరు కూడా కపిలే! 

కార్యక్రమం మొత్తం మొత్తం హాస్య ప్రధానం, పేరే కామెడీ విత్ కపిల్ కదా మరి! మాటల్లో యాంఖర్ కపిల్, క్రికెటర్ కపిల్ దేవ్ ను ఒక విషయం గురించి అడిగారు. అదేమిటో ఈ కింది వీడియోలో చూడండి. 

(పైన ఉన్న వీడియో ముక్క కామెడీ విత్ కపిల్ కార్యక్రమం కలర్స్ టి వి వారి కర్టెసీ)

చూశారు కదా వీడియో. నిజంగా కపిల్ దేవ్ కూతురు అమియా ను చూస్తె చాలా ముచ్చట వేసింది. తన తండ్రి చేసిన తప్పు,  అతి చిన్నది,  అది కూడా ట్రాఫిక్ లైటును,  అదీ గ్రీన్ కు రెడ్ కు మధ్యన  ఉన్న ఎల్లో   లైటును దాటి వెళ్ళటం. అయినా సరే తప్పు  తప్పే,తన తండ్రి  అయినా సరే,  చలానా వ్రాయమని పోలీసును అడగటం గొప్ప విషయం. ఆ తరువాత ఆ పోలీసు నిజంగా చలానా వ్రాశాడా లేదా అన్న విషయం కార్యక్రమం లో దాటవేశారు (వ్రాసి ఉండరు) కాని, ఆ పిల్ల అలా అడగటం ఎంతయినా బాగున్నది. 

ఊరికే ఎవరో వెర్రి వాళ్ళు నలుగురు కలిసి పవర్లోకి రావటానికి అవినీతి నశించాలి అని అరవంగానే  వాళ్ళ చుట్టూ చేరి గెంతటం కాదు. ఈ అవినీతి మనవాళ్ళు, మన దగ్గిర వాళ్ళు చేసినా సరే సహించకుండా ఉండటమే నిజమైన పోరాటం. 

తండ్రి తెచ్చే అవినీతి సంపాదనను హాయిగా అనుభవిస్తూ  ఫేస్ బుక్ లో అవినీతి పోవాలని ఎంత వ్రాసి ఏమి  లాభం, బ్లాగుల్లో ఎంత గింజుకుని ఉపయోగం ఏమిటి. ఆప్ పార్టీ చుట్టూ ఎగరటం కాదు, ఒక సేల్స్ టాక్స్ ఆఫీసరు కొడుకు తండ్రిని  నిలదియ్యాలి, లంచాలు తీసుకుని తనను  చదివించ వద్దని, ఒక ట్రాన్స్ పోర్ట్ అధికారి కూతురు తండ్రి తెచ్చిన గిఫ్ట్ లంచం లోంచి కొన్నది  అయితే  విసిరి కొట్టి ఆవతల పారెయ్యాలి,  చెక్ పోస్ట్ అధికారి కొడుకు తండ్రి తెచ్చిన లంచాల డబ్బుతో చడువుకోనని చెప్పి, మూటలు  మోసి  ఆ డబ్బుతో నైట్ కాలేజీలో చదివి చిన్న ఉద్యోగం సంపాయించినా సంతోషంగా ఉంటాడు. అలా పిల్లలు తమ ప్రవర్తనతో, ఋజువర్తనతో తల్లి తండ్రులను మారుస్తారేమో అన్న ఆశ  అప్పుడప్పుడ, ఇలాంటి కార్యక్రమాలు చూసినప్పుడు పొడచూపటo తప్పేమీ కాదేమో!

ఏదో యువ రక్తం వస్తే రాజకీయాలు బాగుపడతాయని  ఆశ పడ్డాం. కాని జరిగినది ఏమిటి మన రాష్ట్రంలో ఒకానొక యువ నాయకుడు తండ్రిని మించిన వాడయ్యిపొయ్యాడని (అవినీతిలో) రాష్ట్రం రాష్ట్రం నివ్వెరపోయి చూస్తుండగా, దాదాపుగా అంధ్రప్రదేశ్ కు ముఖ్య మంత్రి అయినంత పని అయ్యి ఆ ప్రమాదం కొద్దిలో తప్పింది కదా! విచిత్రం ఆ ప్రమాదం తప్పటానికి కూడా ఒక యువ సినీ నటుడే కారం అంటారు మరి! ఆ సినీ నటుడు ఇకా యువకుడేనా అంటే, వేటగాడు సినిమా, లేదా ప్రేమాభిషేకం సినిమా చూసి తేల్చుకోవాల్సిన విషయమే!

 అలాగే ఉత్తర ప్రదేశ్ లో ఒక యువకుడే ముఖ్య మంత్రి, కాని ఏమిటి లాభం? అక్కడ జరిగే వెధవ పనులన్నిటికీ తన తెలివితేటలన్నీ ఉపయోగించి (అదే తెలివి అని ఆ మనిషి ఉద్దేశ్యం!) సమర్ధించుకుంటున్నాడు. యువకుడైన వాడు తండ్రి పాలించిన చెత్త పధ్ధతిలో కాకుండా పరిపాలనలో మార్పు చూపించి అందరి మన్నన పొందాల్సిoది పోయి, ఆ తండ్రే నయం అనిపించే పరిస్థితి కలిపిస్తున్నాడు ఆ యువ కొడుకు. 

పిల్లలందరూ న్యాయాన్యాయాలు తెలుసుకుని తల్లి తండ్రులను ప్రశ్నించటం  మొదలు పెడితే కాని, తల్లి తండ్రుల అవినీతి ఆలోచనలు,  చర్యలు అరికట్టడం కష్టం. 

ఇంతటి విషయాన్నీ తన కామెడీ షో  లో మెత్తగా హాస్యంతో చక్కగా చొప్పించి చూపిన కపిల్ శర్మ కార్యక్రమం అధ్బుతం, అందరూ చూడతగ్గ కార్యక్రమం. 

• కపిల్ దేవానంద్ లాగ మిమిక్రీ 
• కపిల్ వాజ్పేయ్ నడక 
• కపిల్ దేవానంద్  సినిమా లో పాట పాడటం 
• కపిల్ భార్య వంటల విన్యాసాల కబుర్లు 
• ఇంకా ఇలా ఎన్నో సరదాలు ఈ కార్యక్రమంలో ఉన్నాయి. ఇప్పటికే చూసి ఉండకపోతే,ఈ కింది వీడియోలో పూర్తీ నిడివి కార్యక్రమం చూడండి:

*

***

*

గవాస్కర్ డాన్స్

కామెడీ విత్ కపిల్ కార్యక్రమంలోనే మరొక ఎపిసోడ్ లో గవాస్కర్ ను సెహ్వాగ్ ను పిలిచారు. అందులో, ప్రేక్షకుల్లో ఒకతను, తనకు సెహ్వాగ్ తో విజయోత్సాహంతో నృత్యం చెయ్యాలని ఉన్నదని అడిగాడు. సరే ఆతను వచ్చి సెహ్వాగ్ తో డాన్స్ చెయ్యాలని చూసాడు కాని, సిక్సర్లు బాదే సెహ్వాగ్ డాన్స్ దగ్గర డక్  అయిపోయ్యాడు, ఆ ప్రేక్షక కుర్రాడు సెహ్వాగ్ ను వదిలి గవాస్కర్ ని పట్టుకున్నాడు. ఆశ్చర్యం గవాస్కర్ చక్కగా డాన్స్ చేసి అందరినీ ఆనంద పరిచాడు. ఇంకెందుకు ఆలస్యం చూడండి గవాస్కర్ నృత్యం:

పూర్తి  కార్యక్రమం యు ట్యూబ్లో చూసి ఆనందించండి